ក្រុងព្រះសីហនុ៖ ក្រុមហ៊ុន MH BIOENERGY CO.LTD បានចាប់ផ្ដើមនាំចេញផលិតផលអេតាណុលដំបូងគេបង្អស់នៅកម្ពុជាឆ្ពោះទៅសហគមន៍អឺរ៉ុប ហើយការនាំចេញនេះធ្វើឡើងកាលពីថ្ងៃទី១៦ ខែធ្នូ ឆ្នាំ២០០៨ តាមច្រកកំពង់ផែប្រេងក្រុមហ៊ុនសូគីម៉ិច អតីតរោងចក្រប្រេងកាតក្នុងខណ្ឌស្ទឹងហាវក្រុងព្រះសីហនុ។
តំណាងក្រុមហ៊ុនបានបញ្ជាក់ឲ្យដឹងថា ការនាំចេញផលិតផលអេតាណុលនេះកើតឡើងក្រោមការខិតខំប្រឹងប្រែងរបស់ក្រុមហ៊ុនក៏ដូចជាការជួយជ្រោមជ្រែងពីរាជរដ្ឋាភិបាលកម្ពុជា អស់រយៈពេលជិត២ឆ្នាំចុងក្រោយនេះ។ ផលិតផលអេតាណុលដែលនាំចេញទៅកាន់សហគមន៍អឺរ៉ុបជាលើកដំបូងនេះចំនួន៩.៦០០តោន ចំណុះ៩.៦០០គីឡូលីត្រ។
តំណាងក្រុមហ៊ុនឲ្យដឹងថា ផលិតផលអេណុល គឺជាជីវឥន្ធនៈមួយប្រភេទដែលអាចប្រើជំនួសប្រេងឥន្ធនៈបាន ដោយមិនបង្កឲ្យមានការបំពុលបរិស្ថានឡើយ ហើយជាមួយនឹងការនាំចេញជាលើកដំបូងនេះ គឺជាប្រវត្តិសាស្ត្រ និងមោទនភាពមួយសម្រាប់ក្រុមហ៊ុន MH BIO ENERGY ក៏ដូចជារាជរដ្ឋាភិបាលកម្ពុជាដែលបានបង្ហាញឲ្យពិភពលោកបានឃើញដែរ៕
